Jeffrey ben e teki wan pkin mofodringi fu en te, poti a kopki sdon èn luku farawe.
A ben abi a firi taki wan prakseri lon gwe libi en. San a ben kan de?
Wakti pkinso, a ben e prakseri. So wan sani a no ben e syi na fesi gi den sortu
okasi disi?
Wantronso a ben e kisi wan prakseri. En saka! Efu now a ben sa suku ini en saka?
A ben e bigin nanga en bruku, dan en enpi fu go doro nanga en dyakti.
A no so dan, drape a ben de. Wan pkin brifi pe wan sani ben e skrifi na en tapu.
A ben musu fu de wan prenspari sani, noso a no ben o skrifi en.
Ma pe en aygrasi ben de baka agen? A no ben e memre ensrefi moro pe a ben e
libi en na baka. A ben e suku ini en saka baka agen, ma fu soso. Kande den la fu
en bùrow? A kukrutafra?
A ben e teki wan pisten fosi a ben e feni en aygrasi (a sori taki a ben libi en na
baka ini a was’oso), èn di a ben e sdon baka a ben e aksi ensrefi fu sanede a ben
e tyari en kon. A no ben e leysi en koranti tok? Fu sanede a ben abi en aygrasi
fanowdu dan? A ben e poti en na wan sey, langa fu teki en te èn ben e syi a pkin
brifi sey a kopki.
Na dati a ben de kande? A ben e weri en aygrasi èn leysi a pkin brifi. Trutru a ben
de en eygi skrififasi. A ben e piki:
HORI REYKENIN TAKI SAN YU E MEMRE E GO NANGA BAKA. SKRIFI DEN
PRENSPARI SANI NA TAPU PKIN BRIFI, ÈN MEMRE PE YU BEN E POTI DEN.
DISI SA YEPI YU FU ORGA DEN DEY FU YU. TYARI YU PÈN NANGA YU
BLOKNOWT GO NANGA YU. DEN SA DE FANOWDU NOW DI YU DE YUWAN.
SETI YUSREFI TE YU MEMRE O GI YU BROKO-EDE.
A ben e seki en ede èn ben e poti a pkin brifi baka ini en dyaktisaka. A ben e sori
fu tru taki memre problema ben e naki en, èn now baka a dede fu en pôti Margaret
a ben e tan na baka enwan, a ben e musu fu orga en dey so bun leki a ben man.
Suma ben e kon nanga a prakseri disi baka? A ben e prakseri a tori wantu
momenti, dringi en te èn anga go na baka ini en sturu.
A libi no ben takru someni ete, awinsi a ben e firi tumsi enwan sondro en trowuma.
Olanga den ben e trow kba? A trowe en ay go na loktu fu pruberi fu memre oten a
ben e dede agen. A sani no ben psa solanga ete. A ben kan syi en fesi ete te a
ben e tapu en ay, ma a nen fu en no ben e kon na fesi. A ben e seki en ede. Fa a
ben kan frigiti a nen fu sargi en trowuma? A ben de krin taki en memre ben e gwe
libi en. Wakti pkinso, a ben e denki. A no ben e prakseri wan fasi fu tèkel a
problema disi? Wante a kisi wan prakseri. En saka! Efu a ben sa suku ini en saka?
Baka wantu draylontu a ben e puru en pèn nanga en bloknowt kon na doro.
Fu san den ben de fanowdu? A no ben e skrifi pkin brifi tok? Esko, gi suma a ben
o skrifi den brifi? A ben e poti en pèn nanga en bloknowt na sey en te èn a ben e
pruberi fu poti ala en prakseri na a problema san ben e trobi en. Ma san a
problema ben de baka agen? Mi no e memre misrefi en baka, a ben e denki. Mi
memre no de moro leki san a ben de bifo. We, a ben e besroyti safu’ati fasi, yu no
man du furu nanga dati tu.
Geschreven door: Frank Roger
Oorspronkelijke titel: Geheugensteuntje
Vertaling: Ray Koops